On Fire 2026

ALEX AUFDERKLAMM, che á le titul da Guinness World Record y che é maester de acrobatica tl’aria, porta leteralmënter le spetacul a n livel nü! Cun sües prestaziuns spetacolares sön le Flying Pole strinel le publich y combinëia prestaziuns artistiches de gran livel cun n’eleganza che fej sté söl fle. N’esperiënza unica che garantësc emoziuns, morvëia y fascinaziun pura.

ANNA CAROL, la ciantarina carismatica da Balsan, cun süa usc tlera, ti dá spleundur ala ciantia ofiziala dles Olimpiades „Fino all’aba“. Deboriada cun na gran orchestra y n cor, interpretëiera chësc inn por Milan-Cortina 2026, n punt musical danter Südtirol y le monn.

Canche MARIA DE VAL intonëia le „Juchizer“, se deura na porta sön n ater monn. Cun so „Juchizer“ ti dára le sonn a n iodler arcaich che vëgn dala profondité dles munts de Südtirol y röia diretamënter tl cör. Deboriada cun le cor y la orchestra vëgnel cherié n’imaja acustica che vá sot y che n’á nia debojëgn de parores, mo che dij döt: daciasa, incherscimun y grandëza. Cun i pisc ia por tera y tl medemo sura i confins fora, porta Maria De Val la forza dla musiga popolara sön le gran palch: comovënta, autentica y rica de momënc da pel de iarina. Na cherdada dales Alpes che tëgn toch le monn intier.

DJ ENA, n artist jonn plëgn de energia che s’un capësc fora de gragn momënc, porta sön paladina i sonns liendars de Giorgio Moroder – bunamënter le musizist de Südtirol de maiú suzes a livel internazional, te n medley che vá sot y trasformëia i suzesc dla star mondiala te n spetacul dal ví entusiasmant.

Te so monologh taiënt y autoironich, fej GIANLUCA IOCOLANO n paralel da spavënt assurd danter la strambaria dl alenamënt di atlec olimpics y la batalia creativa por la suraviënza de jobleri, musizisć y d’atri artisć de teater. Danter soius, dübi y euforia incunten Prometeo che porta le füch y te n iade vëgnel tler: ince la trica é na disciplina olimpica. Por talian, cun val’ toch afascinant por todësch y magari ince na preja de dialet.

Cun süa ciantia Focus porta ELIS NOA sön paladina na storia potënta: le momënt dl falimënt, che, avisa coche la devënta, fej pert dl sport, dla musiga y tla vita de vigni porsona. La usc fina y tl medem momënt sterscia de Elisa Godino da Fortëza ti dá ala ciantia na profondité dër intima y particolara. Acompagnada dala orchestra y dal cor, devënta Focus n messaje emozionant che baia dla crëta y dla perseveranza y che nes recorda tan important ch’al é da ciaré de nos instësc, ince ti momënc manco sauris. N’esperiënza emozionanta che ispirëia la reflesciun y dá speranza.

SAIMIR PIRGU, tenor conesciü sura düt le monn y che s’á istruí a Balsan, porta sön paladina Nessun dorma, öna dles aries plü potëntes dla storia dla musiga. Canche ala fin ressonel le conesciü „Vincerò!“, devënta l’opera na detlaraziun olimpica: la orenté da davagné che ne se lascia nia desdrüje y che vá sura düc i limic fora. Chësc spetacul cheriëia n punt danter le monn dla musiga y chël dl sport, te n momënt rich de energia, determinaziun y triunf.

Le posaunist conesciü sura döt le monn PETER STEINER ne dauriará nia ma le spetacul, mo cun süa musiga cheriarál ince le fi cöce che acompagnará döta la serada. Te n leitmotif scrit aposta ti dál n sonn ai cin’ aní olimpics: vigni nota rapresentëia n continënt, le movimënt, l’incuntada, le coliamënt. Cun na tecnica brilanta y profondité che vá a cör trasformëia Steiner la posauna te na porsona che cunta de na serada che mët adöm le podëi dla musiga y dl sport.

Traveler and the Sauce Traveller and the Sauce scialda sö la paladina. So jüch de löms y movimënc impëia n füch che se desleria sura le palch fora. Ritms che verd, corusc che rogor, imajes raiëntes: döt se delega adöm te n rit de pasciun y trasformaziun. Le füch coche simbol de n mëteman nü, de forza y de conesciun: n spetacul che scialda, afascinëia y delibrëia.